Жаңалықтарды Telegram арнамыздан оқыңыз!Сыбайлас жемқорлыққа қарсы іс-қимыл агенттігі атышулы қылмыстық іске қатысты жаңа мәліметтерді жария етті.
Досжан Маратұлы, тілші:
Тергеліп жатқан қылмыстық істер бойынша мемлекетке келтірілген залал көлемі – 7 миллиард теңге. Бірақ бұл алдын ала сомма болғандықтан өзгеруі де мүмкін. Жемқорлыққа қарсы қызметтің хабарлауынша, Арыстанбек Мұхамедиұлы мен өзге де тұлғаларға қатысты тергеу амалдары әлі жалғасып жатыр. Олар ірі көлемде бюджет қаржысын жымқырды және қызмет өкілетін асыра пайдаланды деген күдікке ілінген. Тергеу мәліметтеріне қарағанда Мұхамедиұлының былығы көп. Мәселен, Ұлттық музейдің директоры болып тұрғанда «Алтын адамның әлем мұражайлары бойынша шеруі» және «Қазақстан Республикасының Ұлттық цифрлық киноколлекциясын цифрландыру» секілді ауқымды жобаларға бөлінген қаржыны жымқырған болуы мүмкін. Тіпті Мәдениет және спорт министрі болып тұрғанда мемлекет меншігіндегі мектептер мен ғылыми орталықтарды туыстарының атына жазған деген күдік бар.
Істің ақ-қарасын сот анықтауы тиіс. Әзірге тергеу жүріп жатыр. Оның ауқымды болғаны сонша Мұхамедиұлын қамауда ұстау мерзімі 4 айға дейін, яғни қыркүйекектің 26-сына дейін ұзартылып отыр.
