Жаңалықтарды Telegram арнамыздан оқыңыз!Соңғы күндері бокс сүйерқауым арасында 7 қараша күні өткен қазақстандық боксшы Қанат Ислам мен доминикандық боксшы Джонатан Батистаның жекпе-жегіне қатысты дау басылар емес. «Қазақстан» РТРК» АҚ Қанат Исламның кәсіпқой бокстағы қадамын үнемі қадағалап, оның қатысуымен өткен барлық сындарға ақпараттық қолдау көрсету мүмкіндігін жіберіп алмауға тырысады.
Көпшілікке аян, Қанат жекпе-жектерінің барлығын шетелде өткізіп жүр. Кәсіпқой бокста рейтингтің маңызы зор екені аян. Ал, Ислам бұл салаға жаңа келген адам. Оның үздік боксшылар тізімінде бар болғаны 90-шы орында тұрғаны және белгілі. Сол себепті әзірше ол өткізген кездесулер халықаралық трансляциялар тізіміне ілінбеуде.
Қанаттың жиырмасыншы жекпе-жегі де аталған себеппен көпшілік назарынан тыс қалды. 7 қараша күні Майамиде өткізілген бокс кешінің басты кездесуі - ганалық Фредерик Лоусон мен Кевин Бизье арасындағы жекпе-жек тек жартылай ортақ салмақтағы IBF title eliminator атағына талас болатын. Ал мұндай жекпе-жектер кәсіпқой бокс әлемінде жоғары бағаланбайды. Сондықтан, бокс кеші толығымен көпшілік үшін қолжетімді телеарна емес, трансляцияны әлемге таратуға лицензиясы жоқ интернет-арна арқылы ғана көрсетілді.
Дегенмен, «Қазақстан» РТРК» АҚ шығармашылық ұжымы бұл жекпе-жекті көрермен назарынан тыс қалдырмай, «Қазақстан» Ұлттық телеарнасындағы «Бүгін жексенбі» таңғы бағдарламасында кездесудің қорытындысы жайлы отандастарымызға бірінші болып хабар жеткізді.Эфир барысында Қанатпен тікелей Skype арқылы бейнебайланыс ұйымдастырылып, сол арқылы боксшымыз өзіне көрсеткен қолдауы үшін отандастарына алғыс білдіруге мүмкіндік алды.
Отандық спортшылардың, соның ішінде кәсіпқой боксшыларымыздың жетістіктері «Қазақстан» мен «Kazsport» ұжымының үнемі назарында. Осы күнге дейін көрермендеріміз тек Геннадий Головкиннің ғана емес, сонымен қатар Роман Жайлауов, Иса Ақбербаев және Жанат Жақиянов секілді жігіттеріміздің жарқын жеңістеріне куә болды.
Жақын күндері отандық кәсіпқой боксшылар қатарын тағы бір азаматымыз толықтырмақ. Оның шаршы алаңдағы алғашқы қадамдарын да көрермен біз ұйымдастырған трансляция арқылы бағалай алады. Қанаттың кезекті жеңісіне біз өте қуаныштымыз және отандасымызға кәсібінде де, жеке өмірінде де жетістіктерге жете беруге тілектеспіз.
