Ақпарат. Мемлекет басшысы бүгін томотерапия және ядролық медицина орталығына барды
29.08.2018
Президент жаңа ғимаратты аралап, онкологиялық ауруларды нақты әрі жоғары сапалы сәуле беру арқылы емдеуге мүмкіндік беретін «TomoTherapy HI-HD» құрылғысының жұмысымен танысты. Нұрсұлтан Назарбаев медициналық мекеменің қызметкерлерімен әңгімелесіп, онкологиялық ауруларға диагностика жасау, оларды емдеу барысында заманауи ғылыми әдістерді қолданудың маңыздылығын ерекше атап өтті. Сондай-ақ, Президентке медициналық құрал-жабдықтар мен препараттар шығаратын жаңа кәсіпорынның қызметі жөнінде ақпарат берілді. Айта кету керек, томотерапия және ядролық медицина орталығының арнаулы құрылғылары халықаралық стандарттарға сәйкес ем жасауға және оның сапасын оңтайландыруға, сондай-ақ, алдағы уақытта өзге елдердегі онкологиялық ауруға шалдыққан пациенттерге медициналық көмек көрсетуге мүмкіндік береді.