Ақпарат. «Астана энергия» кәсіпорны жылуға тарифті арзандатты

Елбасы осыдан екі күн бұрын ғана коммуналдық қызметтер саласындағы мәселені Қауіпсіздік кеңесінің отырысына шығарып, әлеуметтік зерттеулер нәтижесі тарифтердің жоғарылығына халықтың алаңдаулы екенін көрсетті деп еді. Монополист кәсіпорындар тұрғындардың қалтасын қағып, негізсіз табыс тауып отырғанын, мұндай ахуалдың қалыптасуы құзырлы мемлекеттік органдардың әрекетсіздігі мен бақылаудың жоқтығынан деп санайтындығын қадап айтқан. Содан бері еліміздің әр өңірінде прокуратураның пәрменімен монополист кәсіпорындар уақытша болса да, тарифтерін төмендете бастады. Соның бірі «Астана энергия» кәсіпорны жылуға тарифті арзандатты. Табиғи монополияларды реттеу, бәсекелестікті және тұтынушылардың құқықтарын қорғау комитеті жүргізген тексеріс барысында мекеменің тарифтік сметаны бұзғаны анықталған. «Астана Энергия» 474 млн. теңге үнемдегенімен, тарифті сол күйі қалдыра берген екен. Енді Табиғи монополияларды реттеу комитеті бұған дейін мекеме бекіткен тарифті өзгертіп, 1777 теңгеден шамамен 1700 теңгеге дейін түсіруді міндеттеді. Ал, «Астана энергия» болса, талапты орындағанымен, бұл шешіммен келіспей отыр.