Білім және ғылым министрлігі мектепке балаларды 6 жастан қабылдауды ұсынады

Білім және ғылым министрлігі мектепке балаларды 6 жастан қабылдауды ұсынады. Бұл туралы бүгін Мәжілісте «Қазақстан Республикасының кейбір заңнамалық актілеріне білім беру мәселелелері бойынша өзгерістер мен толықтырулар енгізу туралы» Заң жобасын таныстырған Білім және ғылым министрлігінің вице-министрі Тахир Балықбаев мәлім етті, деп хабарлайды ҚазАқпарат.

«Қоғамда бұл мәселеге қатысты түрлі пікір бар, көпшіліктің сұрақтары да туындаған. Дегенмен, оқу жылы күнтізбелік жылдан айырмашылығы бар және біз үшін ең бастысы 1 қыркүйек, жаңа оқу жылындағы баланың нақты жасы маңызды. Мектепке баратын баланың 1 қыркүйектегі жасы 6-ға толған болуы керек», - дейді Тахир Балықбаев.