Басты Жаңалықтар Биылғы блогқұрылтай – Қарағандыда

Биылғы блогқұрылтай – Қарағандыда

14.03.2014 12:44

23-24 наурыз күндері Қарағандыда «Блогқұрылтай-2014» атты блогшылар құрылтайы өтеді.

Осыған дейін Алматы, Астана, Шымкент қалаларында ұйымдастырылған құрылтай биыл «Саннан сапаға!» ұранымен өтпек.

Шараға негізінен IТ мамандары, блогшылар, жаңа медиа технологияларымен айналысатын мамандар, журналистер, студенттер, зерттеушілер қатысады. Олар тың жобаларымен бөлісіп, дайындаған бағдарламаларын ұсынады.

Блогқұрылтай аясында ҚР Тұңғыш Президентінің Теміртау қаласындағы мұражайына, Долинка кентіндегі Саяси қуғын-сүргін және аштық құрбандарына арналған кешенге экскурсия жасалады.

Сонымен қатар, аталған құрылтайда «Ұйқыашар», «Селт еткізер» байқаулары өтеді. Бұл байқау блоггерлер арасында ұлттық дәстүрді насихаттауға бағытталған.

«Селт еткізер» - ұлттық тағамдар әзірлеуден қыздар арасындағы байқау, ал «Ұйқыашарда» қыздарға ұлттық нақыштағы сыйлық әзірлеуден жігіттер сайысқа түспек.

«Блогқұрылтай-2014» қорытындысы бойынша үздік шыққан блогшыларға бағалы сыйлықтар мен сертификаттар табысталады.

Бөлісу