Жаңалықтарды Telegram арнамыздан оқыңыз!Боливияда үздіксіз жауған жауынның салдарынан 46 адам ажал құшты, ал 28 мың адам үй-жайларын тастап кетуге мәжбүр болды, деп жазады РБК.
Табиғат апатынан Амазон аймағы Бени, Кочабамба провинциясының орталығы мен Ла-Пас провинциясының солтүстік бөлігі қатты зардап шеккен. Боливияның азаматтық қорғаныс министрлігінің орынбасары Оскар Кабрера хабарлағандай, нөсер 90 муниципалды құрылымның 14 мың гектар жерін жойған.
Бениде апат салдарынан шамамен 1 мың ірі қара жойылды. Жолдардың шайылып кетуінен көптеген шалғай аудандарға жету мүмкін болмай қалды.
Алапат құрбандарының саны елде жауын-шашын маусымы басталған 2013 жылдың қазан айынан бері артып келеді. Ең соңғы рет Потоси аймағында тасыған өзенге ағып кеткен 10 жасар қыздың мүрдесі табылды, оның бауырлары мен суға ағып кеткен басқа да адамдар әлі іздестірілуде.
Боливия үкіметі елде төтенше жағдай жариялады. Денсаулық сақтау министрлігі Бениге дәрі-дәрмектер мен шұғыл көмек көрсететін бригада топтарын жіберуде.
