Жаңалықтарды Telegram арнамыздан оқыңыз!Президенттің Тәуелсіздік турасындағы ой-толғанысына риза болысып, қолдап, үндеу қабылдап жатқан ұйым-одақтар өте көп. Мәселен, Қазақстан Жазушылар одағы, Қазақстан тарихшыларының ұлттық конгресі және Қазақстан халқы Ассамблеясы Мемлекет басшысының Тәуелсіздік туралы идеяларын еліміздің барлық мектептері мен жоғары оқу орындарының білім беру бағдарламаларына енгізуді ұсынып отыр. Тәуелсіздіктің сарқылмас құндылықтарын ұлағат терген ұрпақтың бойына сіңіру маңызды, дейді олар.
Азаттық алған жылдары жүздеген ұлт-ұлыстың баласы қоныстанған Қазақстанның болашағы жарқын боларына сол кезде сенетіндер аз, күдіктенетіндер көп еді. Айрандай ұйысып кетпес, іркіттей іріп салар деген күмәндар ашықтан-ашық айтылды, тіпті кейбір білгіштер саяси болжам жасап, Тәжікстанда болған азаматтық соғыс синдромын қазақ даласынан да іздеді.
Тап сол кезде, яғни 1992 жылы Қазақ Президенті ұлтаралық саясаттың жаңа үлгісін ұсынып, арада үш жыл өткен соң ол идея пісіп-жетіліп, бүгінгі ҚХА құрылып еді. Қазір олар өзге ұлтпыз демейді, өзегіміз бір, біртұтаспыз дейді.
Ол – қазақ, бұл – өзбек, ал мынау – татар. Ұйғыр міне, шешен, түркмен де бар біздің елде. Ұлты бөлек болғанымен бұлардың бәрі – қазақстандық. «Жалғыз отаным бар», дейді, «Қазақстан» деген. Бірнеше ұлттың келісімі сөзсіз – жиырма жылда ел жеткен басты жетістік. Президенттің «Тәуелсіздік толғауында» айтқаны осыған саяды.
«Біз туған елімізді бейбітшіліктің бесігіне айналдыра білдік. Тыныштық арқылы тұрақтылық, татулық арқылы тұтастық төрімізге озды. Барша этностар ел иесі – қазақ ұлтының маңына ұйысты.
Тегі бөлек болғанмен тілегі бір, қаны бөлек болғанмен жаны бір тұтас халық болды. Бірлік, береке – біздің басты байлығымыз, құн жетпес қазынамыз. Тұғырымыз – тыныштық, тірегіміз – тұрақтылық, тілегіміз – татулық болса еліміз тарих төрінен табылады». Н.Ә.Назарбаев.
Тыныштықты тұмар етіп, бірліктің баянды болуы үшін Қазақстан халқы Ассамблеясының сіңірген еңбегі ұшан-теңіз. Келер жылы мемлекеттік маңызы зор ұйымға 20 жыл. Ата Заңымыздың да торқалы 20 жылдығы, Жеңістің 70 жылдығы, ал, Қазақ хандығының құрылғанына 550 жыл толады. Ассамблея мүшелері үшін 2015 жыл мерекелі той жылы емес, өткен жылдарға есеп беріп, болашаққа бағдар жасайтын саналы жыл.
Розақұл Халмурадов, ҚР Парламенті Мәжілісінің депутаты:
Елбасы биылғы «Нұрлы жол – болашаққа бастар жол» деген Жолдауының өзінде осы бірлік, қоғамдық келісім тұрақтылық деген сөздерді 30 рет қайталап айтты. Себебі, сол бірлік болса, қоғамдық келісім болса, Қазақстан дами береді. Бүгінгі күнде Қазақстанды әлемге танытқан да осы еліміздің бірлігі.
Соның арқасында біз әлемге танымал болдық. Бұрын біз басқа шет мемлекеттерге барып, тәжірибесін үйренсек, бүгін шет мемлекеттер, тіпті, сол дамыған Еуропа мемлекеттерінің өзі ҚХА қалай жұмыс істеп жатыр, қалай сендер осы 130-дан артық этнос өкілдеріне қазақтың қасиетті берекелі шаңырағаның астында топтастыра алдыңдар, дейді.
Қазақстан халқы Ассамблеясының атынан Парламент Мәжілісінің депутаттарының қатарында Розақұл Халмурадовтан бөлек тағы 8 азамат бар. Олардың ұлты әр келкі. Өзбек, орыс, шешені де бар. Бірақ, мақсат ортақ.
Депутаттың мұраты - қашаннан қаймақтай ұйып отырған қазақтың бірлігін нығайту, сақтау. Бұл міндетті депутат өзінің қызметтік емес, азаматтық борышына балайды.
Ахмет Мурадов, ҚР Парламенті Мәжілісінің депутаты:
Президенттің «Нұрлы жол – болашаққа бастар жол» бағдарламасынада Ассамблея не істеу керектігі туралы нақты жазылған. Елде қоғамдық тыныштық, ұлтаралық келісім мен толеранттылықты қалыптастыру керек. Аталған рухани құнды дүниелер шетелдік инвестицияны көбейтеді. Бұл өте маңызды. Неге дейсіз ғой?
Өйткені, тек бейбіт, сенімді елге ғана өзге ел қаржысын құяды. Мұны бірінші деңіз. Екіншіден, халық елді басқарып отырған Елбасыға сенуі керек, оның бастамаларын қолдауы керек. Осы мақсатты жүзеге асыру жолында Қазақстан халқы Ассамблеясының мәртебесі бұрынғысынан да арта түсті деп ойлаймын.
Бірлік – жарқын болашақтың кілті. Қазақ елі мұны жете түсінеді. Содан болар, тынышпыз, ынтымақта өмір сүріп келеміз. Қазір Астананың өзінде, 132 103 орыс, 13 736 украин, 10 425 татар, 8736 өзбек, 8406 неміс, 5533 корей, 3913 беларусь, 3889 қырғыз бар. Әзірбайжан, армян, башқұрт, ингуш, поляк, шешен де аз емес.
Бұлардың белсенділері – Ассамблея мүшелері. Иә, Ассамблея дегенде көбіміздің көкейімізге тек әр ұлттың салт-дәстүрі, ән-жыры, би-күйі ғана елестейді. Мерекелік кештердің ұйытқысы деп қана білеміз.
Бірақ, Ассамблея елге үлгі болар игі амалдарды да атқарып жүр. Қайырымдылықпен айналысады. Қарттар мен балалар үйіне жиі барады, мүмкіндігі шектеулі жандарға да қол ұшын береді.
Ләззат Құсайынова, Астана қалалық ҚХА хатшысының міндетін атқарушы:
«Қырғызстан-Астана» деген қоғамымыз бар. 3 жыл бойы осы қоғам мүмкіндігі шектеулі балаларды қарамағына алып, Мүгедектер қоғамымен бірлесіп, біраз іс -шаралар өткізді. Мысалы, Қазақстан-Ресей университеті негізінде олар компьютерлік сынып ашып, 20 шақты мүгедек баланы компьютерлік сауаттылыққа үйретіп, жұмысқа орналастыру әрекетін жасайды. 2015 жылы 120 адамды жұмысқа орналастырамыз деп отыр.
20 жылдық мерейтойды сәнді ғана емес, мәнді де өткізу үшін ұлттық бағдарлама қабылданды. Онда республикалық маңызы зор 48 іс-шара бар. Мұның бәрінің мақсаты түптеп келгенде егемен елдің тыныштығын қалайда сақтап қалу.
Розақұл Халмурадов, ҚР Парламенті Мәжілісінің депутаты:
Елбасымыздың Қазақстан халқы Ассамблеясы төрағасының сындарлы саясатының арқасында біздің ел мәңгілік ел болып қалыптасты. Биылғы Жолдауында айтты. «Тіліміз мемлекеттілігіміз орнықты. Біз шекараларымызды мықтап алдық» деп. Осының өзі мәңгілік елдің дәлелі.
Әсем ИЗАТҚЫЗЫ
