Жаңалықтарды Telegram арнамыздан оқыңыз!Былтыр қолға алынған бастаманың ерекшелігі қалалық әкімдікке қарасты бөлімдердің жұмысы бірыңғайланып, тұрғындарға барынша көмек көрсетіледі. Яғни, бұрынғыдай кабинеттер алдындағы ұзын-сонар кезек жойылып, қызмет көрсету мерзімі де қысқарған.
Сая Рахметова бүгін қалалық әкімдікке немересін балабақшаға кезекке қоюға келген. Кіре берістен-ақ «Ашық әкімдік» жобасының кеңесшісі күтіп алып, жол сілтеді. Қажетті құжаттарын бір жерден алып, электронды кезекке тұрды.
Сая Рахметова, қала тұрғыны:
- Өте қолайлы екен. Кіреберістен кеңесші күтіп алып, электронды талон беріп, керекті кабинетке бардым. Онда кеңесші автоматтық жүйеге кезекке тұру туралы кеңес берді. Өте ыңғайлы.
Жобаның ерекшелігі - қызметтерді оңтайландырып, жемқорлықтың алдын алуға көмектеседі. Яғни, бұрындары кезек күтуден шаршаған кейбір тұрғындар таныс іздеп, пара беруге дейін барса, енді ондай заңбұзушылыққа жол берілмейді.
Руслан Шарипов, «Ашық әкімдік» жобасының жетекшісі:
- Тұрғын үй коммуналдық шаруашылығы саласына қатысты сұрақ туындай қалса, мамандар кеңес береді. Бұл қызметті біз жуырда интернет желісі арқылы да көрсетілетін қыламыз.
Қазіргі таңда күн сайын 200-ден астам адам осы жобаның игілігін көреді. Кедергілер жойылған, келушілерге жағдай жасалған. Болашақта «Smart City» бағдарламасы негізінде қаланың ақпараттық картасын енгізу жоспарланған.
Сағындық СӘБИТҰЛЫ
