Экономика қарқынына сыртқы факторлар әсер етуде - «Qazaqstan» Ұлттық телеарнасы

Экономика қарқынына сыртқы факторлар әсер етуде

17.06.2014
Экономика қарқынына сыртқы факторлар әсер етуде
 
5 ай ішіндегі ел экономикасының баяу өсуіне негізгі фактор ретінде өндірістік өнім өндіру қарқынының төмендеуі мен Украинадағы қақтығыс және Ресей экономикасының әлсіреуі аталды.
 
Бұл ақпаратты Экономика және бюджеттік жоспарлау министрі Ерболат Досаев айтты. Үкімет отырысының қорытындысы бойынша өткен брифингте бас экономист тауар өндіру саласындағы кейбір көрсеткіштерге жете алмаудың да бірнеше себебін атады.
 
Оның ішінде Қашағандағы мұнай өндірісінің тоқтауы мен Жезқазған мыс балқыту зауытының жөндеу жұмыстарына байланысты жабылып қалуы және сыртқы нарықта металл бағасының төмендеуі кедергі болған.
 
Дегенмен, өзге салалардағы оң өзгерістердің нәтижесінде бес айда экономикалық өсім 4,1 пайызды құраған.
 
Теңге бағамын өзгерту саясаты елдің жалпы халықаралық қорының өсуіне әсер етіп, оның көлемі 103,4 миллиард долларды құраған.
 
Ұлттық қор көлемі де 7,1 пайызға өсіп, 75,8 миллиард долларға жеткен.
 
Ерболат Досаев, ҚР Экономика және бюджеттік жоспарлау министрі: 
Жыл соңына дейін 7 ай уақыт бар. Үкімет басшысы барлық саладағы көрсеткіштерді былтырғы деңгейден түсірмеу туралы тапсырма берді. Экономиканы жандандыру үшін қосымша 500 миллиард теңге бөлінгені белгілі. Оның 100 миллиарды шағын және орта бизнесті қолдауға берілді. 250 миллиард проблемалық несиелерді сатып алуға жұмсалды. Қалған 150 миллиард теңге инфрақұрылымды дамытуға бағытталады.
 
Дулат АБИБУЛЛАЕВ

Хабарламаларға жазылу