Жаңалықтарды Telegram арнамыздан оқыңыз!Баптап бақсаң, бір уыс құс бөдене де берекеге кенелтеді. Қостанай қаласының тұрғыны Сақтаған Бақбасов бұған іс жүзінде көз жеткізген. Ол үйінің ауласында бөдене өсіреді. Табысы тасып жатпаса да, пайдасыз емес. Мүмкіндік болса ол алдағы уақытта құстардың санын көбейтуді көздейді.
Дәуренбек Әбдібек, тілші:
Бөдене асырау үшін көп орын қажет емес. Мысалы, мына 10 шаршы метрге жетпейтін жерде 300 құс тұр. Олар арнайы жәшіктерге орналастырылған. Алдына жем салынған, су автоматты түрде келіп тұр. Бұлардан бір күнде 100 жұмыртқа алынады.
Сақтаған Бақбасов 20 бөдене сатып алып, өз кәсібін осыдан үш жыл бұрын бастаған. Тынымсыз еңбектің арқасында олардың санын да көбейтті, күтіміне жайлы етіп қорасын да жабдықтап алды. Суықта бөдене жұмыртқаламайды. Қысы қатты солтүстікте оның жыл он екі ай өнім беруі үшін жылы жер керек. Сондықтан, бұл жерде ауа температурасы бірқалыпты.
Сақтаған Бақбасов, бөдене өсіруші:
- Қораға кірсем, 3-4 сағатқа дейін шықпаймын. Үнемі бірдеңені өзгертіп, жаңартып отыру керек. Қора бұрыннан болды, соған жылу, су тарттым. Пластик терезе орнаттым. Жалпы, құстың күтімі қиын емес.
Бөдене жұмыртқасының нарықтағы құны 20 теңгеден кем емес. Ал, етінің келісі 3 мыңнан асады. Сақтаған бұл құстың өніміне сұраныс жоғары екенін айтады. Себебі, бөдене жұмыртқасы мың дертке дауа.
Найман Сұлтанғазиев, көршісі:
- Жұмыртқаны алып тұрамыз. 3-4 жыл бойы. Тұмауға, басқа да аурулардың алдын алуға жақсы. Еті де жақсы кәуап жасауға, басқа да тағам түрлерін әзірлеуге. Дәмді.
Сақтаған Бақбасовтың қазіргі тұтынушылары көрші-көлемі мен таныстары ғана. Ол алдағы уақытта кәсіпкерлер палатасы мамандарымен кеңесіп, шағын несие алуды көздейді. Мақсаты - құстың санын көбейтіп, өнімін сауда нүктелері мен қоғамдық тамақтану орындарына да өткізу, кәсібінің аясын кеңейту.
Дәуренбек ӘБДІБЕК
«YouTube»-тағы «Qazaqstan TV» арнасына жазылып, AppStore және Google Play сервистерінен «Qazaqstan TV» мобильді қосымшасын тегін жүктеп алыңыз.
