Павлодарда «Бір шаңырақ астында» атты дәстүрлі фестиваль өтуде

Түрлі ұлт өкілдерінің өнерін тамашалағыңыз келе ме? Онда демалыс күндері Павлодарға барыңыз. Әр жексенбі сайын облыс орталығындағы 21 ұлттық-мәдени орталықтар қалалық бақта өнер көрсетеді.

  

«Бір шаңырақ астында» атты дәстүрлі жазғы фестивальді биыл шешен-ингуш этномәдени бірлестігі ашты.

 

Қызығы сол, әдеттегідей Кавказдың құйқылжыған ән-биі орындалған жоқ. Өнерпаздар алдымен қазақ әндерін шырқады, би биледі. Ұлтқа деген, елге деген құрметті осылайша әспеттеуді шешен-ингуш диаспорасының ақсақалдар алқасы ұсынған екен.

 

1944 жылы Солтүстік Кавказдан Павлодар облысына 41 мыңнан аса адам еріксіз көшірілді. Қазір солардың 3,5 мыңы, яғни, 500-ден аса отбасы тұрып жатыр.

 

Ваха Алиханов, шешен ұлттық-мәдени орталығының өкілі:

Мен Қазақ халқына өте ризамын. 44-ші жылы арып-ашып келген бабаларымды туысындай қарсы алып, барымен бөлісті. Қиыншылықта демеу бола білді. Қазақстанның дамуы үшін біз қолдан келгенше ат салысамыз. Бейбітшілік, татулық керек елімізге.

 

Болат АМАНБАЕВ