Балалар сауықтыру орталығына аттанды - «Qazaqstan» Ұлттық телеарнасы

Балалар сауықтыру орталығына аттанды

03.06.2014
Балалар сауықтыру орталығына аттанды
Балалар көптен күткен жаз мезгілі де келіп жетті. Маусым айы басталысымен оқушылар демалыс орындарына ағылуда. Алматы облысының 30 бүлдіршіні Көкшетаудағы республикалық «Балдәурен» сауықтыру орталығына аттанды.
 
Оларды ата-аналары мен «нұротандықтар» теміржол бекетінен салтанатты түрде шығарып салды. Игі іс демеушілердің қолдауымен Халықаралық балаларды қорғау мерекесіне орай, «Бақытты балалық» жобасы аясында қолға алыныпты.
 
Демалуға бара жатқан балалардың барлығы дерлік оқу озаттары әрі тұрмысы төмен отбасыдан шыққан. Оқушылар маусымның 3 мен 17-сі аралығында сұлу Көкше жерінің таза ауасымен тыныстап, табиғатымен танысып, тамашалап қайтады.
 
Бүгінгі шара барысында, шағын концерттік бағдарлама көрсетіліп, ақсақалдар батасын берді. Ұйымдастырушылар мен ата-аналар балаларға сәт-сапар тіледі. Ал, «нұротандықтар» болса, осы жазда 300-ге жуық балаға жолдама беруді жоспарлап отыр.
 
Алдияр Мәметхан, 2-сынып оқушысы
Мен Көкшетауға бара жатырмын. Ол жақтың табиғаты жақсы. Ол жақта қыздармен, ұлдармен достасуға бара жатырмын.
 
 
Тоғжан ЖАЛҒАСБЕКҚЫЗЫ

Хабарламаларға жазылу