Жаңалықтарды Telegram арнамыздан оқыңыз!Орал қаласының орталығындағы «Комплекс Каменный» сауда кешені қызыл жалынның құшағында қалды. Дабыл бойынша жедел жеткен өрт сөндірушілер отқа оранған ғимараттан адамдарды шығарса, жол-патрульдік полициясының жасақтары Құрманғазы және Дина Нұрпейісова көшелеріндегі көлік қозғалысына шектеу қойды.
Тілсіз жаумен күреске қаладағы 4 бөлімшенің 65 қызметкері жұмылдырылды. Соған қарамастан, кешен шатырын түгел шарпыған өртті жылдам сөндіру мүмкін болмады.
Әрі суды лезде мұзға айналдырған қатты аяз бен күшті жел де мамандардың жұмысына біраз кедергі келтірді. Түсте бастаған өртті төтенше жағдайлар қызметкерлері тек түн ауа сөндірді.
Нұрболат Егінбаев, қалалық Төтенше жағдайлар басқармасының бас маманы:
Өрт 1000 шаршы метрді шарпыған. Өрттің себебі, неден болғаны, қалай болғаны бәрі де анықталады. Зардап шеккен адам жоқ.
Рауан ДИӘЛИ
