Алматыда тұрғындар бірнеше сағат жарықсыз қалды

Алматының Алатау ауданында кеше түнде бірнеше сағат бойы электр жарығы өшіп, көшеде көлік қозғалысы қиындады. Әсіресе Almaty Arena маңындағы ықшамаудандарда тас қараңғы болып, ұялы байланыс нашарлаған. Жарықтың сөнуінен бағдаршамдар істен шығып, көлік жүре алмай қалған. «Алатау Жарық Компаниясы» өкілдерінің мәліметінше, екінші Жылу электр стансасына жақын аумақта электр жеткізу желісінен ақау шыққан. Салдарынан Ақбұлақ, Алғабас, Ақкент, Саялы, Теректі, Зерделі сияқты ықшамаудандар және Райымбек даңғылы, Момышұлы, Мөңке би көшелерінің аралығы жарықсыз қалған. Апаттық бригада электр қуатын 5 сағаттан кейін, яғни түнгі 12-лерде қалпына келтірген.