Оралда Қазақстан – Ресей форумы басталды

Оралда Қазақстан – Ресей XXI өңіраралық ынтымақтастық форумы басталды. Екі елдің Мемлекет басшылары ертең бейнебайланыс арқылы форум аясында сөз сөйлемек. Ал бүгін дәстүрлі шара Қазақстан – Ресей іскерлік кеңесінің X отырысымен ашылды.

Ардақ Мұратқызы, тілші:

Форум жұмысы іскерлік кеңес отырысымен басталды. Биылғы жиынның басты тақырыбы – «Жұмысшы мамандықтар – экономиканы дамытатын қозғаушы күш». Сол себепті отырысқа қатысып жатқан кәсіпкерлер, инвесторлар жұмысшы мамандықтарды даярлаудағы тәжірибелерін ортаға салды. Сондай-ақ екі ел арасындағы серіктестік, іскерлік байланысты одан әрі дамытуды талқылады. Батыс Қазақстан облысы Ресейдің 5 өңірімен шектеседі. Облыстың Ресеймен сыртқы сауда айналымы 504 млн АҚШ долларына жеткен. Отырыс аясында қос елдің бизнес өкілдері ынтымақтастықтың негізгі бағыттары бойынша екіжақты құжаттарға қол қойды. 

Ардақ Мұратқызы, тілші:

Іс-шараға 300-ден астам кәсіпкер қатыспақ. Өйткені форум ұзақ жылдар ішінде Ресей мен Қазақстан өкілдерінің тұрақты диалог алаңына айналды. Негізгі басты іс-шаралар ертең өтеді. Екі елдің Мемлекет басшылары бейнебайланыс арқылы форум аясында сөз сөйлейді деп жоспарланып отыр. Форум жұмысы әрі қарай тақырыптық кездесулермен жалғасады.