Оңтүстік Кореяның экс-президентіне тағы бір айып тағылды

Бүгін Оңтүстік Кореяның экс-президенті Юн Сок Ёлге билікті асыра пайдаланды және дұшпан мемлекетке көмектесті деген жаңа айыптар тағылды. Арнайы прокурор мәлімдегендей, бұрынғы мемлекет басшысы елде төтенше жағдай жариялау үшін Оңтүстік пен Солтүстік Кореяны бір-бірімен соғыстыруға әрекеттенген.

Естеріңізге сала кетсек, Юн бүлік үшін биыл сәуірде қызметінен аластатылып, тергеуге алынды. Егер кінәсі дәлелденсе, ол өлім жазасына кесілуі мүмкін. Юнның өзі болса, әскери жағдайды оппозициялық партиялардың заңсыздықтарын тоқтатып, елді «мемлекетке қарсы элементтерден» қорғау үшін енгізгенін мәлімдеп келеді.