АҚШ-та сенаторлар үкімет жұмысын қайта жандандыруға уағдаласты

АҚШ тарихында ең ұзаққа созылған шатдаун тоқтауға жақын. Себебі Америка Сенатындағы екі партия да үкіметтің жұмысын қайта жандандыруға уағдаласты. Құрама Штаттардың мұндай дағдарысқа ұшырауына Конгрестің мемлекеттік қызметті қаржыландыру туралы құжатты мақұлдай алмауы себепші. Сол дау салдарынан АҚШ үкіметі 40 күн жұмыс істемей, қазанның 1-інен бері бір жарым миллион адам ақысыз демалысқа жіберілді. Сонымен қатар үкімет қызметі тоқтағандықтан, әуежайларда 3 мыңға жуық авиациялық рейс доғарылып, 8600 ұшақтың сапары кейінге қалдырылған.