Дональд Трамп пен Си Цзиньпин бірқатар келісімге келді

Оңтүстік Кореяның Пусан қаласында АҚШ және Қытай лидерлерінің кездесуі өтті. Жабық есік форматындағы жүздесу 1 сағат 40 минутқа созылған. Келіссөз соңында тараптар баспасөз мәслихатын өткізген жоқ. Оның қорытындысын Дональд Трамп ұшақта журналистерге баяндап берді. Ақ үй басшысының айтуынша, Вашингтон қытайлық тауарларға тарифтерді 57 пайыздан 47-ге дейін төмендетті. Бұған жауап ретінде Бейжің АҚШ-қа фентанил экспортын тоқтатуы тиіс. Cонымен бірге Қытай АҚШ-тан соя сатып алуды, сирек металдарды экспорттауды жалғастырады. Трамп сәуір айында Қытайға сапар шегетінін мәлімдеді. Си Цзиньпинмен кездесуде Тайвань мәселесі қозғалған жоқ. Тараптар Украинадағы соғыс бойынша бірлесе жұмыс істеуге келіскен.