Оңтүстік Кореяда Трампқа қарсы шеру өтті

Оңтүстік Кореяның Кёнджу қаласында АҚШ президенті Дональд Трамптың сапарына қарсы шеру өтіп жатыр. Наразылық акциясын жұмысшылар кәсіподақтары ұйымдастырған. Демонстранттардың айтуынша, Трамп Кореяны Америкаға инвестиция салуға және тарифтерді қабылдауға мәжбүр ете отырып, ел экономикасын күйретіп жатыр. Құрама Штаттар лидері Оңтүстік Кореяға осыдан бірнеше сағат бұрын барды. Трамптың мәлімдеуінше, Вашингтон пен Сеул таяу уақытта сауда келіссөзін аяқтайды. Тағы бір айта кететін жайт, осы аптада Оңтүстік Кореяда Азия-Тынық мұхит экономикалық ынтымақтастығы ұйымының саммиті өтеді. Сол жиын қарсаңында, яғни ертең Трамп Қытай төрағасы Си Цзиньпинмен кездесіп, екіжақты қатынастарды талқылайды.