Президент қазақстандықтарды Республика күнімен құттықтады

Мемлекет басшысы қазақстандықтарды Республика күнімен құттықтады. «Қазақстан осыдан 35 жыл бұрын Егемендік декларациясын қабылдап, жаңа дәуірге қадам басты. Біз Тәуелсіздігіміздің саяси-экономикалық тұғырын бекіттік, шекарамызды айқындап, оны бүкіл әлемге таныттық. Сондай-ақ азаматтарымыздың әл-ауқатын арттыру жолында зор жетістікке қол жеткіздік. Дегенмен алдымызда бұдан да зор міндеттер тұр. Біз барлық азаматқа бірдей мүмкіндік беретін Әділетті Қазақстанды құрып жатырмыз. Еліміздің келешегі – әрқайсымыздың қолымызда. Қазақстанның көк туы әрдайым биікте желбіресін! Баршаңызға зор денсаулық, бақ-береке және мол табыс тілеймін!» - деді Президент.

Президент Мемлекеттік ту көтеру рәсіміне қатысты

Одан соң Қасым-Жомарт Тоқаев Мемлекеттік ту көтеру рәсіміне қатысты.

Құрмет қарауылының бастығы Президентке рапорт берді. Содан кейін еліміздің Мемлекеттік туы көтеріліп, әнұраны орындалды. Мемлекеттік ту көтеру рәсімі барлық өңірде жалғасты.