24 қазан – Біріккен Ұлттар Ұйымының құрылған күні

Бүгін – Біріккен Ұлттар Ұйымының құрылған күні. Осыған орай Алматыда халықаралық беделді ұйымның 80 жылдығына арналған жиын өтті. Шараны Қазақстан Сыртқы істер министрлігінің Алматы қаласындағы Өкілдігі мен БҰҰ-ның Қазақстандағы Тұрақты Өкілдігі бірлесіп ұйымдастырды. Жиында сөз алғандар Қазақстанның көпжақты дипломатияны дамытуға қосқан үлесін және ұйымның қағидаттары мен мақсаттарына адалдығын атап өтті. Сондай-ақ Мемлекет басшысының БҰҰ Бас Ассамблеясының соңғы сессиясында айтқан халықаралық бейбітшілікті, қауіпсіздікті және орнықты дамуды нығайтуға бағытталған бастамаларын сөз етті. Басқосуда халықаралық күн тәртібіндегі өзге де мәселелер талқыланды.

Ақмарал Арыстанбекова, Қазақстанның БҰҰ жанындағы тұңғыш тұрақты өкілі:

Қазақстан Біріккен ұйымына мүше болған алғашқы күннен-ақ ұйымның қызметіне белсене араласты. Біз бейбіт өмірге ұмтылып, қуаты жөнінен әлемде төртінші орынға ие ядролық қарудан өз еркімізбен бас тарттық. Жер бетіндегі ең үлкен ядролық сынақ алаңдарының бірі Семей полигоны жабылды. Осылайша Қазақстан әлемдік қауіпсіздікті нығайту жолында көптеген тың бастама көтеріп, көпке үлгі бола білді.