Қоқыс полигонынан шыққан өрт: Төтенше жағдай енгізілді

Алматы облысындағы Алатау қаласында төтенше жағдай енгізілді. Бұған қоқыс полигонындағы ірі өрт себеп. Бұл шешім қолданыстағы заңнамаға сәйкес қабылданған. Өрт ауқымды аумақты қамтығандықтан, төтенше жағдай режимін енгізу барлық қажетті күш пен құралды – өрт сөндірушілерді, құтқарушыларды, арнайы техниканы дер кезінде жұмылдыруға және барлық қызметтің жұмысын үйлестіруге мүмкіндік береді. Қабылданған шаралар салдарды жою жұмыстарын жеделдетуге бағытталған, дейді жауапты мамандар. Қазір барлық қызмет күшейтілген режимде жұмыс істеп жатыр. Жағдай тұрақты бақылауда. Тұрғындардың өміріне еш қауіп жоқ. Өрттің шығу себебін анықтау мақсатында арнайы тексеріс жүргізіледі.