Туберкулезді 2 сағатта анықтауға болады

Елімізде туберкулездің күрделі түрін емдеу жолдары жетілдірілді. Ұлттық фтизиопульмонология орталығының ақпарынша, бұрын дерттің мұндай ауыр түрін емдеу 2 жылға созылса, қазір 9-12 айда жазылып шығуға болады. Ал ең күрделі түрін емдеу 3 жылдан 1,5 жылға қысқарды. Жаңа дәрілердің тиімділігі 90 пайыздан асады, дейді мамандар. Соңғы 10 жылда туберкулезбен ауыратындар саны 43%-ға, дерттің таралуы 52 пайызға, ал өлім көрсеткіші 75,6 пайызға төмендеген.

 Мәлік Әденов, Денсаулық сақтау министрлігі Ұлттық фтизиопульмонология ғылыми орталығының директоры:

Бүгінде елімізде бастапқы медициналық-санитариялық көмек ұйымдарында туберкулезді анықтаудың заманауи молекулалық-генетикалық әдістері енгізілді. Бұл тәсіл арқылы небәрі 2 сағаттың ішінде туберкулез қоздырғышын және оның дәріге сезімталдығын анықтауға болады. Соның арқасында емдеуді дер кезінде бастап, аурудың таралу қаупін едәуір азайтуға мүмкіндік туады.

Динара Жарқынбек