Қазақстандық 9 банк ортақ QR төлем жүйесіне көшеді

Қазақстандық 9 банк ортақ QR төлем жүйесіне көшеді. Бүгін Ұлттық банк осындай мәлімдеме жасады. Бастама жыл соңына дейін іске қосылады. Қазір 9 екінші деңгейлі қаржы ұйымымен келісім жасалған. Олар «Халық банк», «ЦентрКредит банкі», «Freedom Bank», «Altyn Bank», «RBK», «Bereke», «Forte», «Home Credit Bank» және «Нұрбанк». Яғни, осы банктердің кез келгенінің қызметін тұтынатын адамдар бір QR кодты сканерлеп, төлем жасай беруге болады. Бұл банктердің арасындағы аударымдарды да телефон нөмірі арқылы жүргізетін жүйені енгізу жұмыстары жүріп жатыр.

Ерлан Ашықбеков, ҚР Ұлттық банкі департаментінің директоры:

Біз ортақ жүйе құру арқылы банктер арасындағы байланысты орнатамыз. Және клиенттерге жаңа мүмкіндік ашамыз. Жаңа жүйеге банктердің бірігуі, ықпалдасуы нені білдіреді? Біріншіден, клиент өз банкі арқылы кез келген банкке қандай да бір шектеусіз өзінің төлемдерін, аударымдарын жасауға мүмкіндік алады. Тариф мәселесіне келгенде бұл жерде біз банктерге шектеу қойып, олардың тарифін реттеу мүмкіндігін әзірге қарастырып отырған жоқпыз.

Оңғар Алпысбайұлы