Астанада халықаралық форум өтеді

Астанада 29–30 мамыр күндері өтетін халықаралық форумның маңызы зор. Сарапшылардың айтуынша, бұл жиын тек жаһандық өзекті мәселелерді талқылау алаңы емес, сонымен бірге Қазақстанның халықаралық бастамаларға белсенді қатысуын көрсетеді.

 Ерділда Таутенов, «Экономикалық зерттеулер институты» АҚ төрағасының орынбасары:

«Қазақстан үшін мұндай форумның пайдасы – халықаралық аренада өзімізді көрсету, мәселелерді шешуге деген ынтамызды білдіру, одан бөлек басқа елдердің бизнес өкілдеріне, инвесторларға біздің елдегі тұрақтылықты көрсетіп, дамуға деген біздің құлшынысымызды көрсетіп, өзімізді паш ету деуге болады».

Форумда геосаяси, әлеуметтік-экономикалық және климаттық мәселелерді шешу жолдары қарастырылады. Сарапшылардың пікірінше, мұндай бастамалар Қазақстанның халықаралық беделін арттырып, инвестициялық тартымдылығын күшейтуге жол ашады.