Жаңалықтарды Telegram арнамыздан оқыңыз!«Наурыз жұмыскер» ипотекалық бағдарламасы басталғалы 20 күнге таяды. Бірақ коммуналдық қызметкерлер тізімнен өз мамандағын таппай, біраз сабылды, әуре-сарсаңға түсті. Десе де, бүгін мәселе оң шешімін тауып, жұмысшы мамандардың алды өз пәтеріне кіре бастады.
Нұрболат - коммуналдық көліктің жүргізушісі, отбасымен үй жалдап жүргелі 2 жылдан асқан. Айлығының көп бөлігін баспанаға беріп келген. «Наурыз жұмыскер» бағдарламасы шыға салысымен, үйлі болудан үміттенген. Бүгін үміті ақталып, пәтер кілті қолына тиді.
Нұрболат Байтасов, «Астана тазалық» ЖШС қызметкері:
Дайындалып, құжат жинап жүргенбіз. Соған ілікпейсіздер деген ақпаратты естіп, уайымдап қалып едік. Енді өз шаңырағымызға кіріп отырмыз. Қуаныштымыз.
Дәл Нұрболаттай «Астана тазалықта» 2 мың қызметкер бар. Бәрі де жұмысшыларға арналған ипотека басталады деп дайындалды. Артынша өздерін тізімнен таппай, қуаныштары су сепкендей басылған. Содан соң өз учаскелеріне бекітілген мәслихат депутатына шағымдарын жеткізіпті.
Ләззат Разбекова, қалалық мәслихат депутаты:
Коммуналдық қызметкерлер «Наурыз жұмыскер» бағдарламасына ілікпей қалғанын білгеннен бастап, біз дабыл қақтық. Құзырлы органдарға депутаттық сауал жібердік. Әлеуметтік желінің мүмкіндіктерін де кеңінен пайдаландық. Міне, біздің үніміз естіліп, шұғыл арада «Отбасы банкі» де, Әлеуметтік қорғау министрлігі де сауалға жауап беріп, мәселе оң шешімін тауып отыр.
Иә, бүгінде «Астана тазалықтың» 10 шақты маманы жеңілдетілген несиеге ие болды. Енді олар 6 ай ішінде пәтер іздеп, қоныстанады. Ал «Отбасы банк» әлі 300-ден аса өтінім қабылдайтынын хабарлады.
Дәрия Батенова, «Отбасы банк» АҚ орталық филиалы директорының орынбасары:
Осы жылға 72 млрд ақша бөлінген. Онда 2440 адамға несие беріледі деп жоспарланған еді. Бүгінгі таңда 58 млрд теңге ақшаға 2105 өтінім қабылданды.
«Бағдарлама бірнеше жыл жалғасады. Үлгермегендер алдағы жылы құжат тапсыруға мүмкіндігі бар», - деді банк өкілдері. Ал биыл «Наурыз жұмыскердің» игілігін 2 мыңнан астам жұмысшы маман көре бастады.
Ақниет Балтанова
