Жаңалықтарды Telegram арнамыздан оқыңыз!Дональд Трамптың импортталатын тауарларға баж салығын өсіру туралы шешімі бір күн өтпей жатып әлемдік қор нарықтарын құлдыратып жіберді. Уолл-стрит құнды қағаздары бір күн ішінде соңғы бірнеше жылда болмаған ең көп құнын жоғалтты. Инвесторлар өзге елдер де АҚШ әрекетіне қарсы қарымта жауап ретінде тарифтерді өсірсе, дүниежүзілік сауда байланысы баяулап қана қоймай, жаһандық экономикалық рецессия қаупі күшеймек деп алаңдап отыр.
Сэм Стоволл, CFRA Research компаниясының инвестициялық стратегі:
Қор нарығының құлдырауына тарифтер туралы жарияланымның көпшілік күткеннен де қатал болғандығы себеп. Инвесторлар енді біздің сауда серіктестеріміз тарапынан да тиісті кек алу әрекеттері болады деп алаңдауда. Бұл тарифтер қаншалықты ұзақ уақытқа созылатыны белгісіз. Неғұрлым ұзақ болса, нарық соғұрлым төмендейді. Экономикалық даму әлсіреп, корпоративтік пайда азаяды. Бұл түптеп келгенде әлемдік экономиканы рецессияға ұшыратады.
Трамптың тариф саясаты бірінші кезекте автоқұрастыру нарығына соққы болып тиді. Бүгін әлемдік алпауыт автоөндіруші Стеллантис АҚШ-тағы бес нысанынан 900 жұмысшыны уақытша жұмыстан шығарып, Мексика мен Канададағы құрастыру зауыттарындағы өндірісті тоқтатқанын хабарлады. Бірақ, бұған қаймығып жатқан Трамп жоқ. Баж салығын өсіру арқылы Америка бюджетіне жүздеген миллиард доллар қосымша қаржы түседі деген Ақ үй басшысы АҚШ экономикасы қарыштап дамитынына сенімді.
Дональд Трамп, АҚШ президенті:
Бұл операция. Науқасқа ота жасағандағыдай үлкен іс. Мен дәл осылай болатынын айттым. Біздің елімізге 6 немесе 7 триллион доллар инвестиция құйылады. Қор серпіліс жасайды, ел серпіліс жасайды. Оған көп ұзамай куә боласыз.
Бірақ, әзірге қор нарығымен бірге доллар да бір жарым пайызға құнын жоғалтты. Яғни, инвесторлардың америкалық валютаға деген сеніміне селкеу түсті. Бұл кейбір елдерге қатысты тарифтің күшіне енбей тұрғандағы ахуал. Ал, жаңа баж салығы іске қосылса және оған әлемнің өзге елдері қарымта ретінде тариф енгізсе әлемдік экономикалық тұрақсыздық қатері күшейе түспек.
Жалғас Сәдібекұлы
