Жаңалықтарды Telegram арнамыздан оқыңыз!Елімізде 7 сәуірден бастап көлікті сақтандыру ақысы қымбаттайды. Себебі автосақтандыру талаптарына енгізілген түзетулер күшіне енеді. Міндетті сақтандыру полисінің құны әрбір жүргізуші үшін жеке есептеледі, дейді Қаржы нарығын реттеу және дамыту агенттігі. Құжатқа сәйкес, жүргізушінің тәжірибесі мен жасы, автокөлікті тіркеу аймағы, автокөлік түрі мен қызмет ету мерзімі және жүргізуші кінәлі деп танылған жол апаттарының болу-болмауы ескеріледі.
Серікбосын Төлебеков, ҚР Қаржы нарығын реттеу және дамыту агенттігі департамент директорының орынбасары:
Бірінші рет сақтандырылған жүргізушілер үшін 1,8 коэффициенті бар жаңа А класын енгізу олардың жол-көлік оқиғаларына жиі ұшырайтындығымен түсіндіріледі. Бұл сақтандыру төлемдерінің артуына алып келеді. Статистикаға сәйкес, олар екі есе көп жол-көлік оқиғасын жасайды.
Агенттіктің мәліметінше, Алматы, Түркістан, Жамбыл, Батыс Қазақстан, Қызылорда облыстары, сондай-ақ Шымкент пен Астана қаласының жүргізушілері үшін сақтандыру полисінің бағасы көтеріледі. Ең қымбат полисті Қызылорда облысының көлік иелері рәсімдейді. Мамандардың сөзінше, егер жүргізуші соңғы бес жыл ішінде жол апатына ұшырамаған болса, керісінше оның сақтандыру полисі арзандайды. Ал жол ережесін жиі бұзатындар мен апатқа кінәлі жүргізушілер үшін сақтандыру құны қымбаттайды. Сондықтан мамандар 7 сәуірге дейін ескі тарифпен көлікті сақтандырып үлгеруге кеңес береді.
Қуан Нұрақын
