Жаңалықтарды Telegram арнамыздан оқыңыз!Миллионнан аса тұрғыны бар Шымкентте өндіріс орындары көбейіп келеді. Соның арқасында қарапайым еңбек адамдары тұрақты жұмыс істеп, нәпақасын тауып отыр. Мәселен он жыл бұрын ашылған алюминий зауытында қазір жүздеген жұмысшы бар. Алып өндірістегі еңбегі ерен жандар туралы Айнұр Әбліқасымқызының бейнематериалын көріңіздер.
Өз саласының жетік меңгерген мамандардың бірі - Ғалымжан Ақкөзов. Білікті механик 30 жылдан бері өндіріс орындарында бел жазбай еңбек етіп келеді. Соңғы 10 жылдан бері алюминий өңдейтін ірі зауытта істейді. Зейнетке шығар алдында жас мамандарды үйретіп жүр.
Ғалымжан Ақкөзов, механик:
Ең бірінші бастаған кезде 1 пешпен іске кірістік. Қазір құдайға шүкір мінекей 4 пешіміз бар. Төрт пеште 4 желі жұмыс істеп тұр. 3 өлшемде алюминий картинкасын шығарамыз.
Алюминий пештегі мың градус ыстықта 3,5 - 4 сағат бойы балқиды. Ерітіліп, сұйытылған соң, арнайы қалыптарға құйылады. Зауыттағы ең үлкен пештің сыйымдылығы 15 тоннаға дейін жетеді. Кәсіпорында бұдан басқа тағы 3 пеш бар. Тек олардың көлемі әртүрлі.
Ал Құрбанбай Мамырәсілов дайын болған өнімдерді автокар арқылы межелі жеріне жеткізеді. Әрі қарай әр орамы 1 тоннадан асатын алюминий сымдарын үлкен жүк көліктеріне тиейді. Күн сайын шамамен 30 тонна орамдарды тасиды.
Құрбанбай Мамырәсілов, жұмысшы:
Істеп жатқаныма екі жыл болды. Ең алғашқысы автокар болатын. Барлық жұмысты осы автокар арқылы істейміз. Үш тоннаға дейін көтеретіні бар, әртүрлі. Бес тонналық автокар да бар.
Павлодар қаласынан әкелінетін шикізаттан 3 түрлі алюминий сымдары өндіріледі. Дайын өнім еліміздегі кабель мен трансформатор шығаратын зауыттарға жеткізіледі. Өзгесін шетелдіктер сатып алады.
Бекжан Айтқұлов, зауыттың бас директоры:
Өнімдерімізді Қазақстанға сатамыз, сонымен қатар шетелге экспорттаймыз. Атап айтқанда Өзбекстан, Қырғызстан, Тәжікстан. Қазіргі таңда тауарымызды Түркияға, Украинаға жөнелтіп жатырмыз.
Кәсіпорынға техникалық бағыттағы мамандар ауадай қажет. Мәселені шешу үшін жоғары оқу орындарының студентттеріне зауытта тәжірибе жинақтауға мүмкіндік берілген.
Айнұр Әбілқасымқызы
