Жаңалықтарды Telegram арнамыздан оқыңыз!Ертең «Наурыз» тұрғын үй бағдарламасына өтініш қабылдау басталады. «Отбасы банк» өкілдерінің хабарлауынша, биыл мемлекет 11 мыңнан астам азаматтың баспаналы болуына мүмкіндік жасап отыр. Оған қазынадан 300 миллиард теңге бөлінген. Өтінім «Baspana Market» сайты арқылы қабылданады. Ол үшін алдын ала тіркелу керек. Жүйеге кірген соң, «Наурыз және Отау ипотекасы» бойынша өтінім беру батырмасын басып, менің өтінімдерін бөліміне кіресіз. Сол жерде «Наурыз» бағдарламасын таңдайсыз. Шарттармен танысып, үй алғыңыз келген аймақты белгілейсіз. Процесті жалғастырып депозитті таңдап келісім бересіз. Одан әрі өзіңіз бен отбасы мүшелерінің атында соңғы 5 жылда баспана болмағанын растайсыз. Өтінім беруді аяқтау үшін электронды цифрлық қолтаңба арқылы қол қоясыз.
Бағдарламаға экранда көрсетілген санатқа жататын 18-ден 63 жасқа дейінгі азаматтар қатыса алады. Бастапқы жарна әрленген жаңа пәтер үшін – 10%, әрленбеген және екінші нарықтағы баспана үшін – 20%-дан басталады. Шотта 2 миллион теңге болу шарт. Несиені өтеу мерзімі – 19 жыл.
«Отбасы банк» өкілдерінің мәліметінше, биыл мемлекет 11 мыңнан астам азаматтың баспаналы болуы үшін қазынадан 300 миллиард теңге бөлген.
Асылбек Данияр
