Жаңалықтарды Telegram арнамыздан оқыңыз!Қазір әлемде ең тез дамып келе жатқан сала – IT-индустрия. Мысалға, 2023 жылы әлемдік IT-нарықтың көлемі 4,5 трлн долларға жеткен. Бұл ең серпіндік көрсеткіш. Содан бері жаңа саланың қарқыны бәсеңдеген жоқ. Қуантарлығы - жаһанның озық ойлы ІТ-мамандарының арасында қазақстандықтардың үлесі басым. Біздің өнертапқыштардың стартаптарына шетелдік инвесторлар миллиондаған доллар құйып, игілін әлем көріп отыр.
Әсел Тілеубаева Америкаға 14 жасында көшіп барған. Білім алды, қазір ІТ саласында үлкен жетістіктерге жетіп жатыр. Оның жобасы жасанды интеллектінің көмегімен азаматтарға көші-қон мәселесін шешіп беруге ықпал етеді. Мысалға, Америкаға жұмыс визасын алу үшін бір адам 600 бетке дейін жететін құжат әзірлеп, 2-3 ай жүреді. Ал бұл компанияның көмегімен бар болғаны екі аптада барлық жұмысты тындыруға болады. Өйткені заңгерлерге барлық жұмысты жасанды интеллект ықшамдап отырады.
Әсел Тілеубева, «Alma» ІТ-компаниясының құрылтайшысы:
Біз бұл стартапты «Alma» деп атадық. Себебі «Alma» Орта Азиядан шығып, әлемге тараған. Біздің компания да сол сияқты дүниежүзіне тарап, бәріне көмек болса дейміз. Осы компанияның құрылтайшыларының үшеуі де иммигрантпыз. Біріміз Қазақстан, басқасы Қырғызстаннан, мен Қытайдан дегендей. Біз бұл мәселенің қаншалықты өзекті екенін білеміз және адамдарға көмектескіміз келеді.
Ардақ Құсайынова телефон арқылы сөйлесіп отыр. Бірақ адаммен емес. Өзі және әріптестерімен бірге құрастырған қосымша әңгіме-дүкен құруға жарап тұр. Ол АҚШ-та 13 жылдан бері тұрады. Әуелі осында оқуға келген. Кейін ІТ-саласында ден қойып, 10 жыл аралығында түрлі ойын құрастыра бастаған. Олар ойлап тапқан телефондағы 4 ойынның өзі компанияға млрд-таған доллар табыс әкеліпті. Қазіргі жобасы - жасанды интеллектінің көмегімен жұмыс істейтін – Atarino стартапы. Бұл агент сіздің досыңыз да, көмекшіңіз де болады. Алгоритм күрделі тапсырмаларды орындап, дербес шешім шығарады.
Ардақ Құсайынова, ІТ-кәсіпкер:
Мысалы, сіз бір жерге көлікпен бара жатырсыз, енді қазір сізге билет алу керек. Мысалы, Алматы-Астана арасында. Сонда сіз интернеттен он рет қарамай, дауыс серігіңізге айта саласыз. Маған қазір мынандай нәрсе керек деп. Ол оны шешіп тастайды. Билеттерді ғана емес, одан да күрделі мәселелерді де шеше алады. Мысалы, маған мынандай салон тапшы және келесі жұмаға жазшы десең, ол оның бәрін істей алады.
Соңғы жалдары елдегі IT-қызметтің экспорты кемі 5 есеге өскен. Ақшаға шақсақ әр жылдары жарты миллиард долларға жуықтаған. Осылайша, Қазақстан бұл бағытта Орталық Азияда көш бастап тұр.
