Жаңалықтарды Telegram арнамыздан оқыңыз!Шаруаларға 120 млрд теңге берілді. Қаражатты қолына алғандар көктемгі егіс жұмыстарына қызу кірісіп кетті. Дала жұмысын алаңсыз бастауға мемлекеттің қолдауы сеп болды. Бұл мүмкіндік кез келген шаруа үшін қолжетімді. «Кеңдала-1», «Кеңдала-2» бағдарламалары арқылы 5 пайызбен несие алады. Кепілдіктің 85 пайызына мемлекет қолдау білдіреді. Мысалы, 10 млн теңгеге несие алсаңыз, оның 85 пайызына мемлекет кепілдік берсе, қалған 15 пайызын ғана шаруа төлеуі тиіс. Бүгін Ауыл шаруашылығы министрі Айдарбек Сапаровтың төрағалығымен салаға қатысты жиын өтті. Министр 5 пайыздық несие жайлы әр өңірдің әкімдігі шаруаларға жеткізуі тиіс деді.
Ербол Тасжүреков, Ауыл шаруашылығы министрінің орынбасары:
Көктемгі егіс, дала жұмыстарын қаржыландыру үш есеге көбейді. Биылғы жылы біз осы қаржыландыруды 700 млрд теңгеге дейін ұлғайтып жатырмыз. Бүгінгі күні 120 млрд теңге игерілді. Әлеуметтік кәсіпкерлік корпорациялар несие беретін болды. Барлық шаруа қожалықтарына жеңілдетілген пайызбен беріледі.
Сондай-ақ қант қызылшасын өндіретін зауыт иелеріне де мемлекеттен қолдау артты. Жалпы, былтыр 1 млн 300 мың тонна тәтті түбір жиналған. Бұл өнімнен 120 мың тонна таза қант алынады деген жоспар бар.
Шәймерден Ахметов, Ауыл шаруашылығы министрлігі департамент директорының орынбасары:
Былтырға дейін қант зауыттарының қуаттылығын арттыру және жаңа зауыттар салуды ынталандыру үшін 25 пайыздық субсидия көзделген болатын. Биылдан бастап 25 пайызды 40 пайызға дейін көтеріп отырмыз. Яғни, толық зауыт құнының 40 пайызына дейін бюджеттен субсидия ретінде қайтарылып беріледі.
Самал Қабышева
