Жаңалықтарды Telegram арнамыздан оқыңыз!Алматы облысында 170 бала апатты жағдайдағы ғимаратта білім алып жатыр. Ибрагим Нүсіпбаев атындағы мектеп-интернат оқушылары жартылай қираған нысанда тұрып, оқу корпусында түнеп, спортзалда тамақтанады. Мұндай келеңсіздіктерді Балалар құқықтары жөніндегі уәкіл Динара Зәкиева тексеріс барысында анықтаған. Білім алушылардың мұндай күй кешуіне кім кінәлі? Мәселенің мән-жайын Ернұр Медет анықтап көрді.
Ернұр Медет, тілші:
Бір қарағанда бұл жерді сарбаздар жататын казарма деп ойлауыңыз мүмкін. Алайда осы аядай ғана бөлмеде отан қорғаушылар емес, мектеп оқушылары түнейді. Жауапсыз мердігерлердің кесірінен 30 шаршы метрге жетер-жетпес аумақта 20 шақты бала тынығуға мәжбүр.
Одан сорақысы 3 жылдан бері білімгерлер спортзалда тамақтанады. Доп, қақпа және өзге де жаттығу құралдары тұратын жерде үстел, орындық және ыдыс-аяқ тұр. Ал оның санитарлық талапқа сай емес екендігі айтпаса да түсінікті, - дейді мамандар.
Жанна Ахметова, «Балалар қорғауда» қорының жетекшісі:
Біз Динара Зәкиевамен тексеріс барысында антисанитариялық жағдайларды анықтадық. Мұнда, тіпті, жуынатын орын тапшы. Кішкентай ұл-қыздар салқын суды пайдаланады. Тамақ дайындайтын асхананың өзі тым ескі. Ол жер оқу ғимаратынан 300-400 метр қашықтықта орналасқандықтан, көше арқылы арбамен екі ортада тамақ тасиды.
Қысқаша түсіндірсек, осыдан 3 жыл бұрын мектеп жатақханасы күрделі жөндеуден өтуі керек еді. 60 жылдан аса уақыт іші-сырты жаңармаған нысанның құрылысына бюджеттен 600 млн теңге қарастырылыпты. Бірақ 3 айдың ішінде жатын-орынды адам танымастай өзгертеміз деген жауапсыз компания 3 жыл өтсе де, ештеңе бітірмеген. Жосықсыз мердігерге хабарласып, мән-жайды білмек едік. Тұтқаны көтермеді.
Гүлсара Исағұлова, Алматы облысы Білім басқармасы басшысының орынбасары:
Құрылыс компаниясының соншалықты жауапсыздығының кесірінен бүгінгі күнге дейін созылып келе жатыр. 3 рет сотқа берілгеннен кейін барып, апеляция жасап отырып, «GRAND STROY SERVICE» компаниясын жосықсыз деп шығарды.
Бастауыш сынып оқушылар алдағы бір-екі күнде басқа интернатқа ауыстырылады, дейді жауаптылар. Ал жоғары сыныптағы балалар амал жоқ жылды осы оқу ордасында аяқтауға мәжбүр.
Гүлсара Исағұлова, Алматы облысы Білім басқармасы басшысының орынбасары:
Облыс әкімі жеке инвесторлар тауып, Қонаев қаласында, облыс орталығында интернат салып беру мәселесін қарастыруда. Бұл мәселе - шешілген мәселе. Инвесторлар табылды. Жеке өзінің ақшасына салып береді де, сол жерге бұл интернатты көшіреміз. Интернат осы Ибрагим Жүсіпбаев атында қалады.
Жосықсыз мердігердің кесірінен қаланың қақ ортасындағы ғимарат қараусыз қалатын болды. Жауапсыз компания енді алдын ала төлемге берілген 100 млн теңгені қайтаруы тиіс. Сонымен қатар тұрақсыздық үшін үстіне 11 млн қосып береді.
Ернұр Медет
