Қостанай облысындағы Ахмет Байтұрсынұлы ауылында өзен суы арнасынан асып жайылды

Қостанай облысындағы Ахмет Байтұрсынұлы ауылының тұсында Ұлы Жыланшық өзенінің суы арнасынан асып жайылды. Бұл жайт жергілікті жұрттың алаңдаушылығын тудырды. Былтыр дәл осы елдімекен тасқын судың қоршауында қалып, бір ай қатынассыз, үш ай жарықсыз отырған еді. Алайда төтенше жағдай мамандары әзірге алаңдауға негіз жоқ дейді. Облыс аумағында өзендердің деңгейі көтерілуі байқалмайды. Су басуы мүмкін 101 елдімекен қырағы бақылауда. Ал Ахмет ауылында жағалауға жайылған су ешқайдан ағып келіп жатқан жоқ.

Бұл - ауа райының күрт өзгеруіне байланысты. Алдымен жылынды, сосын суыды. Салқындаған соң мұз қалыңдап, салмағы үлкейді. Су өзеннің жағасына шықты. Жалпы, ол ауылға қауіп-қатер төніп жатқан жоқ.