Жаңалықтарды Telegram арнамыздан оқыңыз!Жұмысшы мамандықтарын даярлайтын өндірістік комбинаттың жағдайы мүшкіл. Түркістан облысының Мақтаарал аудандындағы оқу орны 47 жылдан бері жөндеу көрмеген. Осында оқитын 2 мыңға жуық бала қыстың көзі қырауда жылуға жарымай, жаурап отыр. Көзден таса қалған өндірістік комбинатқа өңір басшылары неге қолдау көрсетпей отыр? Тілшіміз анықтады.
Болат Селеубаев, Оқу-өндірістік комбинат директорының шаруашылық жөніндегі орынбасары:
Мынау тоқтың сымдары 1958 жылдан бері жаңартылмаған. Әбден тозығы жеткен. Қазір 4 сынып бос. Жылуы жоқ. Бір жерін жамасақ, бір жері кетеді. Әлек болумен шаршап жатырмыз.
Мұқанбай Сейдуалы, оқушы:
Сыныпта біз көп отыра алмаймыз. Үстіңе сырт киім киіп қана отыруыңа болады. Ғимаратта әжетхана, ыстық су жоқ. Сол жағынан да қиналамыз.
Азынап тұрған ескі ғимаратта 2 мыңға жуық бала оқиды. Тігінші, автоэлектрик, көлік жүргізушісі мамандықтарын меңгеріп жатыр. Комбинат 1978 жылы ашылған. Ал ғимарат одан әріде 1958 жылы салыныпты. Қазіргі сиқы осы. Едені шұрық-тесік. Ұстаздар оның үстіне тақтай қойып, амалдап отырғандарын айтады. Жиһаз жаңартылмаған, материалдық-техникалық база тіптен жоқ. Өткен ғасырдағы оқу құралдарымен үйретуге мәжбүр.
Гулбу Қубатбекова, Оқу-өндірістік комбинатының директоры:
47 жылдан бері тек қана мұғалімдердің күшімен жөндеу істеледі. 11-сыныптың оқушылары дәл осы кішкентай ғана орындықтарда отырады. Жиһаз деген мүлдем бізге келмейді. Біз мектептерден сұрап аламыз. Баяғы ескі компьютерлермен отырмыз. Ол бірде істесе, бірде істемейді.
Оқу орнының көлік жүргізу алаңын, көліктер тұратын орнын да аудан әкімдігі 4 жыл бұрын өз мұқтаждығына алыпты. Содан бері азын-аулақ көлік қызметкерлердің үйінде қаңтарылып тұр дейді маман. Жаңадан жер береміз деген әкімдік уәдесі де орындалмапты.
Молдабек Ағатаев, шебер:
Артында көлік жүргізіп үйренетін алаң бар еді. Сол жерді өздері тұрақ қылып алды. Не көшеге айдата алмаймыз. Себебі көлік полициясы 4-5 мәрте ұстап алды.
Өндірістік комбинаттың өзекті мәселесін аудандық білім бөлімінің басшысы жете білмейтінін жасырмады. Өйткені ешқашан барып көрмепті. Десе де биыл жұмысшы мамандықтар жылы екенін ескере отырып, ескі ғимаратты жөндеуге қаржы бөлетін ниет бар деді.
Асанхан Қошқаров, Мақтаарал аудандық білім бөлімі басшысының уақытша міндетін атқарушы:
Біз білім басқармасына осы мәселеге қаржы қарау бойынша ұсыныс айттық. Егер білім басқармасынан қолдау тапса, биыл күрделі жөндеуге енеді. Сол кезде мәселенің бәрі шешіледі. Техникалық базасына да қарайтын боламыз.
Көлік жүргізушілерін үйрету үшін арнайы учаске бөлінбек. Әзірге жер қайдан беріледі, құрылысқа қанша қаражат жұмсалатыны нақты емес. Ал жыл сайын өндірістік комбинатты бітіріп шыққан студенттердің 30 пайызы ғана жұмысқа орналасып, тағы осыншасы білімін жоғары оқу орындарында жалғастырады.
Айнұр Әбілқасымқызы
