Енді дүкен сөрелері отандық өніммен толығады

Енді дүкен сөрелерінің кемінде 50%-ы қазақстандық азық-түлік өнімдерімен, ал 20%-ы тұрмыстық тауарлармен толтырылуы тиіс. Олар көрнекі әрі қолжетімді жерлерге орналастырылуы керек. Сауда және интеграция министрі отандық өндірушілерді қолдау мақсатында осындай бірқатар міндеттеме бекітілгенін айтты.

Арман Шаққалиев - Алматы қаласындағы ірі сауда желілерін аралап, кәсіпкерлермен кездесіп, дүкен сөрелеріндегі отандық өнімдердің үлесін арттыру мәселесін талқылады. Сондай-ақ, сауда орталықтарында отандық өндірушілердің тауар көрмелерін ұйымдастыруды ұсынды. Бүгінде оңтүстік шаһарда 11 ірі сауда желісі және 3 жарым мыңнан астам шағын дүкен жұмыс істейді.

Айдар Әбілдабеков, ҚР СИМ сауда комитетінің төрағасы:

Бірнеше отандық тауар өндіруші тікелей осы сауда желісіне өнімін жеткізеді екен. Соның ішінде пияз да бар, картоп та бар, сәбіз де бар, қырыққабат та бар, мысалы. Бағалап шықтық, тура осы сауда желісінде 47% қазақстандық өнім.

Ақниет Балтанова