Жол салуға бөлінген 11 млрд теңге талан-тараж болған

Жол құрылысына бөлінген 11 млрд теңге талан-таражға салынған. Бұл туралы Сыбайлас жемқорлыққа қарсы іс-қимыл агенттігі хабарлады. Жол құрылысы саласында жоспарлаудан бастап, жұмыстарды қабылдауға дейін 1 200-ден астам жемқорлық тәуекелдері анықталды. Жобалар қолмен тексерілгендіктен, құжаттарда құрылысқа жұмсалатын қаржы еселеніп көрсетіліп келген. Осындай айла-тәсіл қолданған 600-ге жуық факті әшкереленді. Мұндай заңсыздықты болдырмас үшін, Антикор көлік министрлігіне 100-ге жуық ұсыныс жіберген.

Данияр Бегайдаров, ҚР Сыбайлас жемқорлыққа қарсы іс-қимыл агенттігінің ресми өкілі:

Жобалық-сметалық құжаттаманы дайындау мен сараптаманы автоматтандыру, Жол активтері сапасының ұлттық орталығының өкілеттіктерін күшейту, техникалық қадағалаудың жауапкершілігін арттыру, автожолдардың цифрлық картасын құру және басқа да мәселелер бойынша 100-ге жуық ұсыныс енгізілді.

Динара Жарқынбек