Батыс Қазақстан облысында сең бұзған көпір қайта салынды

Батыс Қазақстан облысының Бәйтерек ауданында бұзылған көпір қайта жөнделіп, пайдалануға берілді.

Көктемгі су тасқыны кезінде Деркөл өзеніндегі аспалы көпірге мұз тіреліп, істен шыққан еді. Мамандар сеңді тарқатып, техника көмегімен өткелді көтергенде темір сымдары үзіліп кетті. Сол үшін көпірді бұзуға тура келді.

Кейін Бәйтерек аудандық бюджетінен жөндеуге 40 млн теңге қаражат бөлініп, ауылды облыс орталығымен жалғайтын өткел қайта ашылды. Ұзындығы 110 метр нысанның биіктігі тағы бір метрге көтерілді. Барыс-келістің жеңілдегеніне риза болған ауылдықтар қала жақ беттен көлік тұрағын жасақтап, айналаның абаттандырылғанын қалайды.

Құрманғазы Хайруллин, Октябрь ауылының тұрғыны:

Бізге ауыл тұрғыны ретінде өте жақсы болды. Өзгеше етіп, бір метрге көтеріп істелді, бұл бізге оңтайлы. Енді мұз келсе де, қай уақытта да қорықпай өте береміз. Тек күзде, көктемде балшықтан жүре алмай қаламыз. Соны тегістеп, бұталарды тазартып, осы жерден көлік аялдайтын орын жасап берсе деген өтінішіміз бар.

Ардақ Мұратқызы