Батыс Қазақстанда қызылша жұқтырып, ауруханаға түскендер саны көбейді

Батыс Қазақстан облысында қызылша жұқтырып, ауруханаға түскендер саны екі есе өскен. Қазір облыстық жұқпалы аурулар ауруханасында 64 адам ем қабылдап жатыр. Дені – бала. Жыл басынан бері 261 науқас тіркелген. Оның 179-ы - кәмелеттік жасқа толмаған. Дерт, әсіресе, Орал қаласы мен Ақжайық, Бөрлі, Бәйтерек, Сырым және Қаратөбе аудандарында дендеп тұр. Өңірде 3600 бала қызылшаға қарсы иммундалуы керек. Солардың 2 мыңына екпе салынған. Қорда 15 мың доза вакцина сақталған.

Айнаш Ғұбайдуллина облыстық Денсаулық сақтау басқармасы басшысының орынбасары:

Өткен аптада бізде стационарда 36-38 науқас болатын болса, екпеден бас тартқандардың салдарынан бүгінгі күнде аурушаңдық көбейіп кетті. Екі есеге жуық. Бүгін 64 болып отыр. Сондықтан тездетіп ата-аналарды егуге шақырамыз, балаларын алып келіп ектірсін.

Ардақ Мұратқызы