Жаңалықтарды Telegram арнамыздан оқыңыз!Қарахан дәуіріне жататын үлкен шаһардың орны табылды. Аумағы 100 гектарға жайылған қала Жамбыл облысына қарасты Сарыбарақ ауылының маңында орналасқан. Аталған аймақта зерттеу жүргізген Ә.Марғұлан атындағы Археология институты мамандарының айтуынша, тарихи ескерткіш XI-XII ғасырларға жатады.
Оған сол орыннан табылған қыш ыдыстардың және басқа да күнделікті тұрмыста пайдаланылған бұйымдардың қалдықтары дәлел. Ғалымдардың топшылауынша, шаһарда мешіт немесе ғибадат жасайтын ғимарат та болған. Тіпті қала ауыз су тарату желісімен де қамтылған екен.
Ералы Ақымбек, Ә.Марғұлан атындағы Археология институтының жетекші ғылыми қызметкері:
Қыш құбырдың бөлшегін тауып алдық. Бұл дегеніңіз сол кездегі қаланың халқы таза ауыз сумен қамтамасыз етілгенін білдіреді. Ол өзеннің жоғары жақтағы бір бұлақтан ба әлде бөгет жасап, суды тұндырып қойып, қаланың ішіне жіберді ме? Содан қалаға су құрбырлары арқылы таза ауыз су келгенін білдіреді.
Нұрсұлтан Тілектес
