Жаңалықтарды Telegram арнамыздан оқыңыз!Қарулы Күштерді жоғары технологиялық қару-жарақпен және техникамен қамтамасыз етуге үлкен мән беріледі. Отан қорғаушы күніне арналған салтанатты жиында Мемлекет басшысы осылай деді. Президент нақты ұрыс қимылдарында тиімділігін дәлелдеген қару үлгілері сатып алынатынын айтты. Сонымен бірге олар отандық кәсіпорындарда шығарылады. Қасым-Жомарт Тоқаев Отан қорғаушыларды мерекемен құттықтап, қайсар сарбаздарымыз ел қауіпсіздігін сенімді қорғап тұрғанына тоқталды. Бұрын-соңды болмаған әлемдік геостратегиялық шиеленіс кезінде еліміздің қорғаныс қабілетін арттырудың аса маңызды екенін ерекше атап өтті.
Қасым-Жомарт Тоқаев, Қазақстан Республикасының Президенті:
Құрметті сардарлар және сарбаздар, ардақты ардагерлер баршаңызды Отан қорғаушы күнімен құттықтаймын. Осыдан отыз жыл бұрын Тұңғыш Президент Нұрсұлтан Әбішұлы Назарбаевтың Жарлығымен Қазақстанның Қарулы Күштері құрылды. Бұл мемлекеттігімізді нығайту жолындағы маңызды қадам болды. Біз егемендік алған кезде әскери әлеуеті мықты армия жасақтауға баса мән бердік. Отаншыл әрі кәсіби мамандардың арқасында бұл міндетті ойдағыдай атқардық. Қорғаныс саласындағы негізгі мәселелер дер кезінде шешімін тапты.
