Жүргізуші куәлігін беру процесі автоматтандырылады

Енді көлік жүргізушілері куәлікті оңай ала алады. Жүргізуші куәлігін беру және автомобильге мемлекеттік тіркеу нөмірлік белгісін дайындау процестері автоматтандырылады. Ол үшін Халыққа қызмет көрсету орталықтарында арнайы терминал қойылады. Терминал биометриялық жүйемен жабдықталған, суретке түсіру функциясы бар, интерфейсі де түсінікті. Сол арқылы куәлікті алуға өтініш беріп, суретке түсіп, қолтаңбаңыздың үлгісін қалдырып, QR-кодпен мемлекеттік бажды төлеуге болады. Мұндай терминалдар орталық қызметкерлерінің жүктемесін азайтып, құжатты рәсімдеу процесін жеделдетеді. Бұл тәсілді әзірге пилоттық режимде енгізу мәселесі пысықталып жатыр.