Ресейде еңбек мигранттарының 30% елден кетуге мәжбүр

Ресейде санкциялардың салдарынан жұмысшы тапшы. Еңбек мигранттарының 30% елден кетуге мәжбүр.

Индира Бегайдар, тілші:
Елде құрылыс, қоғамдық көлік, тамақтану саласында жұмыс күші жетпей жатыр. Құрылыс министрлігінің мәліметінше, тек Мәскеуге 3 млн жұмысшы қажет. Жалпы Ресейде 8-9 млн мигрант жұмыс істейтін. Қазір іскерлік белсенділік төмендеді. SWIFT жүйесінен ажыратылған соң, шетелге ақша аудару мүмкін емес. Тығырыққа тірелген мигранттар үйлеріне қайтуға мәжбүр.

Вадим Коженов, РФ Мигранттар федерациясының президенті:
Қазір әуе билеттерінің бағасы қымбаттап кетті, мигранттардың жұмыс істеуіне көптеген қиындық туды. Біздің болжамымыз бойынша, еңбек мигранттарының бір бөлігі көктемге қарай жеке секторға ауысуы мүмкін. Бұл – жұмыс күшіне тапшылық артады деген сөз. Ресейге келу үшін жол қымбат болғандықтан, мәселе ушыға түседі.

Индира Бегайдар, тілші:
Соңғы айда азық-түлік бағасы шарықтап кетті, дәрі-дәрмек тапшылығы да айқын сезіліп отыр. Ресей нарығындағы дәрі-дәрмектің 70% сырттан импортталатынын ескерсек, қазір дәріханалардан адам өмірі үшін аса маңызды дәріні табу қиын. Қаржы нарығындағы ахуал да нашарлап барады. Экономистер осы айда дефолт болуы мүмкін екенін айтады.

Индира Бегайдар