Еуропада «омикрон» штамы өршіп тұр - «Qazaqstan» Ұлттық телеарнасы

Еуропада «омикрон» штамы өршіп тұр

01.02.2022

Еуропада «омикрон» штамы өршіп тұр. Батыс Еуропа елдерінде індетті бір тәулікте 100-200 мың адам жұқтыруда. Вирустың мутацияға ұшыраған түрлеріне тосқауыл қою үшін қарт құрлық елдері екпе науқанын күшейтуде. Бүгіннен бастап Австрияда 18 жастан асқан азаматтар екпе алуға міндетті. Еуропадағы соңғы ахуалды баяндауға әріптесім Нұрсұлу Қасым қосылды.

Нұрсұлу Қасым, тілші:

Халық міндетті вакциналауға қарсылық білдіріп, қайта-қайта шеру өткізіп жатыр. Бірақ елдің канцлері заңға бағыну қажеттігін қадап айтты. Бүгіннен бастап халыққа түсіндіру жұмыстары жүргізіліп, вакцина салдыртуға бір жарым ай уақыт беріледі. 15 наурызға дейін екпе сертификатын алмағандарға 3600 еуро айыппұл салынады. Аяғы ауыр әйелдер мен ковидтен жазылғанын растайтын 6 айға жарамды сертификаты барлар екпеден босатылады. Германия саясаткерлері де дәл осындай заң қабылдауды талқылап жатыр. Елде халықтың 74 пайызы толықтай вакцина алған. Қалған 20 млн адам екпе салдыртпайынша үкімет карантиндік шектеулер жеңілдетілмейтінін ескертті. Германияда бүгін бір тәулікте коронавирус 100 мыңға жуық адамнан анықталған.

Еуропалық одақта ковидке қарсы жаңа препарат қаншалықты тиімді?

Нұрсұлу Қасым, тілші:

Дәрі-дәрмек жөніндегі Еуропалық агенттік америкалық «Pfizer» компаниясының «Paxlovid» деп алатын дәрісін бекітті. Ересектерге арналған. Зерттеу жүргізген мамандардың пайымынша, таблетка тәуекел тобындағы азаматтардың ковидпен ауруханаға түсуін, індеттен қайтыс болуын 90 пайызға төмендетеді. Әрі «Омикронға» қарсы тиімді дейді дәрігерлер.


Хабарламаларға жазылу