Жаңалықтарды Telegram арнамыздан оқыңыз!Ақпарат және қоғамдық даму министрі Асқар Умаров Бас мүфти Наурызбай қажы Тағанұлымен кездесті. Кездесу барысында Қазақстан мұсылмандары діни басқармасының қызметіне қатысты өзекті мәселелер талқыланды.
Тараптар қоғамдағы деструктивті діни ағымдардың идеологиясына қарсы іс-қимыл бойынша сындарлы пікір алмасты. Сондай-ақ, ақпарат таратудың түрлі арналарын, атап айтқанда БАҚ, әлеуметтік желі, мессенджерлер, кітаптар және т.б. құралдарды пайдалана отырып, Мүфтияттың ағарту жұмысының сапасын жаһандық трендтерге сәйкес жаңа деңгейге көтеру туралы да сөз болды.
Министр қаңтардағы қайғылы оқиғалар кезінде мұсылман қауымға үндеу жасап, жұртты бірлікке, бейбітшілікті сақтауға шақырған азаматтық ұстанымы үшін Бас мүфтиге зор алғыс білдірді.
«Қазақстан мұсылмандары діни басқармасы еліміздегі конфессияаралық келісімді нығайтуға ықпал ете отырып, ұдайы халқымызды рухани құндылықтар төңірегіне топтасуға үндеп келеді», - деп атап өтті Асқар Умаров.
Кездесу қорытындысы бойынша тараптар министрлік пен Қазақстан мұсылмандары діни басқармасы арасындағы тығыз ынтымақтастықты одан әрі жалғастыруға дайын екенін білдірді.
