Алматыда Қазақстан Жазушылар одағының әдеби жыл қорытындысы өтті

«Тәуелсіздік әдебиеті». Алматыда осындай атаумен Қазақстан Жазушылар одағының әдеби жыл қорытындысы өтті. Зиялы қауым өкілдері әлемдік пандемиядан кейін алғаш рет осылай бас қосып отыр. Соңғы екі жыл маңызды шара онлайн режимде ұйымдастырылған болатын. Тәуелсіздік мерекесіне орайластырылған басқосуда Жазушылар одағының бір жыл ішінде атқарған жұмыстары баяндалды. Сондай-ақ 2021 жыл қорытындысы бойынша Халықаралық «Алаш» әдеби сыйлығының жүлдегерлері анықталды. Республиканың түкпір-түкпірінен келген ақын-жазушылар өз ойларымен бөлісіп, мемлекет тарапынан жасалып жатқан қолдауға ризашылықтарын білдірді.

Жанұзақ Аязбеков, ҚР Жазушылар одағы Қостанай облыстық филиалының директоры:

Қазір барлық облыста жергілікті атқару органдары шығармашылық адамдарына қолдан келген жақсылықты жасап жатыр. Бір жерлерде кітаптарын шығарып жатыр, бір жерлерде үйберсе, бір жерлерде грант, стипендия тағайындап жатыр. Міне, осының бәрі қамқорлық. Өйткені шығармашылық адамына мұның бәрі керек.