Қазақ қызы Қытайда «Ұлттар аруы» атанды - «Qazaqstan» Ұлттық телеарнасы

Қазақ қызы Қытайда «Ұлттар аруы» атанды

15.01.2014
Қазақ қызы Қытайда «Ұлттар аруы» атанды

Қытайда тағы бір қандасымыз қалың елді мойындатты.  Күнбике есімді қазақ қызы жуырда өткен бүкілқытайлық қыз сыны байқауының бас жүлдесін иеленді. Бұл дәстүрлі байқау Қытайды мекен ететін   56 ұлт өкілі арасында өткізіледі.

 
Осымен үшінші рет ұйымдастырылып отырған арулар байқауына қазақ қызы тұңғыш рет қатысқан екен.  Десе де, өнері, көркі, талантымен қытайлардың таңдайын қақтырған қазақ аруы «56 ұлттың гүлі» деген атаққа ие болды.
 
Күнбике  жастайынан Қытайдың бас телеараналарында жүргізуші болуды армандаған. Миллиардтан астам  халық арасынан суырылып шығу оңай емесін ұққан ол арманына  қол жеткізуге  бала кезінен дайындалды. Өнерде де, оқуда да озат болды.
 
Қытай, қазақ, ағылшын тілдерінде емін-еркін сөйлейді, домбыра тартады, ән салып, би билейді, таэквондомен айналысады. Түрлі сайыстарға қатысып,  талай сахнаның төрінен көрінген. «Шыңжаң арулары» сайысының  бірнеше мәрте жеңімпазы. Енді «56 ұлттың  аруы»  атанып отыр. 
 
Күнбике Нұрқызы, «Ұлттар гүлі» арулар  байқауының жеңімпазы:
Қаншама ұлттың алдында қазақ халқының бар өнерін көрсеткеніме қуаныштымын.
 
Аталмыш сайыс үш жылда бір рет ұйымдастырылып тұрады. Биыл үшінші кезегі өтті. Шыңжаң автономиялық округының атынан бес ұлттың өкілі қатысқан: қазақ, қырғыз, ұйғыр, өзбек және татар арулары.
 
Қатысушылар қытай тілі мен өз ана тілін меңгеру, өз ұлтын таныстыру, ән-би өнерін көрсетуден жарысқан. Күнбике барлық айналымда алдына жан салмады.  Әсіресе, қытай тілінде, яғни, ханьзуша сөйлеуден ханьдықтардың өздерінен асып түскен.
 
Әсия, «Ұлттар аруы» байқауындағы қырғыз ұлтының өкілі: 
Күнбике ақылды, сұлу, қазақ қыздарының образын таныстыруға лайық қыз.
 
Дәурен БАУЫРЖАНҰЛЫ

Хабарламаларға жазылу