Жаңалықтарды Telegram арнамыздан оқыңыз!Атырау облысында қайтадан балық қырылып жатыр. Исатай ауданындағы Нарын каналында 200 келіге жуық су маржаны өлген. Бүгінде айдын бетіндегі өлексе шабақтар санитарлық талаптарға сай көмілді. Жауапты мамандардың айтуынша, бұған су деңгейінің төмендеп, оттегінің жетіспеушілігі себеп болған.
Сондай-ақ, «Қазсушар» кәсіпорнының балансындағы бұл арнаның жылдар бойы жөндеу көрмей, ескіруі де өз әсерін тигізуде. Өйткені ағыстың өтуіне кедергілер көп. Бұдан бөлек, Атырау-Астрахан тасжолын салып жатқан мекемелердің де кесірі болуы мүмкін. Айта кетейік, мұндай факт жыл басынан бері осымен 3 рет тіркеліп отыр.
Артур Сәдібекұлы, облыстық балық шаруашылығы басқармасының басшысы:
Бұл каналдан, кесіліп қалған каналдан жол жөндеу жұмыстарын жүргізіп жатқан мердігер мекемелер су алып отыр екен. Менің мәліметімше, олардың ауызша пайымдауынша сол каналдан су алуға келісімі бар деп ескертті. Енді ары қарай қандай шара қолданып, қалай шешеміз соны қарастырудамыз. Маусым басында Қызылқоға ауданы Ойыл өзенінде болды балық өлімі, сосын Махамбет ауданында. Бәрінің әкеліп соқтырғаны - судың деңгейінің төмен түсуі.
Жандос Темірғали
