Жаңалықтарды Telegram арнамыздан оқыңыз!Аптап ыстықта аңқасы кеуіп отырған ауыл! Ақтөбе іргесіндегі Маржанбұлақ елді мекенінің тұрғындары екі аптадан бері сусыз күнелтуге мәжбүр. Бау-бақшасы қурап кеткен. Іргедегі бұлақ қана халықтың жанын сақтап отыр. Жақсыбек Кемал тарқатсын.
Ауыл халқы осылайша шілденің шіліңгірінде қиналып қалды. Кейінгі жылдары су тапшылығына тап болған елдімекен жұрты бау-бақша де екпей қойған. Еккендерінің еңбегі еш кеткен. Соңғы күндері әкімдік тіршілік нәрін арнайы көлікпен тасымалдап беріп жатыр. Алайда, оның өзі баршаға бірдей жетпейді.
Қартқожақ Жанаев, ауыл тұрғыны:Су қиын боп тұр бізде. 40-42 градус ыстықта мүмкін емес.
Ауылдың екі бөлігіне ауыз су күн ара кезекпен беріліп жатыр. Алайда, тұрғындар оның өзі өте аз, дейді. Әрі ішуге жарамсыз.
Римма Бесжанова, ауыл тұрғыны:Қосқанның өзінде бірталай уақытқа дейін сары түсті болады. Ал, біз жақта тіпті жоқ. Өзіміздің күшімізбен боранда, қыста шелекпен бұлақтан алып келеміз.
Жақсыбек Кемал, тілші:Маржанбұлақ аулындағы үш жарым мың халықтың күндері қазір мына жалғыз бұлаққа қарап тұр. Бұл жердің өзінде күні бойы ұзын-сонар кезек. Кей күндері тұрғындар мынадай бір-екі құты ғана су алып үлгеретіндерін айтады.
Аудан басшыларының айтуынша, ауыл маңында барлау жұмыстары жүріп жатыр. Одан кейін жобалық-сметалық құжаттары дайындалуы тиіс. Ал, қазіргі тапшылық тұрғындардың бау-бақшаға суды көптеп алуынан туындап отыр дейді.
Ауылда жаңадан салынған мыңға жуық үйге су құбыры жеткізілмеген. Тұрғындардың кейбірі ауласынан 700-800 мың теңгеге құдық қаздырып алып жатыр. Ал, оны қалтасы көтермейтіндер амалсыз әзірге суды құтылап тасуға мәжбүр.
Жақсыбек Кемал
